శ్రీ శివాయ గురవే నమః

“అభినవ కాళిదాస” శ్రీ తెల్కపల్లి రామచంద్ర శాస్త్రి గారి

శ్రీ ఉమా మహేశ్వర సుప్రభాతం -(28-04-17)

అనువాదకుడు ; డా.తాడేపల్లి పతంజలి

సృష్టిస్థితి ప్రలయహేతు విభక్త భవ్య
మూర్తిత్రయ! త్రిపుర దైత్య దవాంబువాహ !
నిత్యానవద్య నిగమాంత విచార వేద్య
శ్రీమన్మహేశ్వర! విభో ! తవసుప్రభాతం!!13

తాత్పర్యము

సృష్టి , స్థితి, ప్రళయముల కొరకు బ్రహ్మ విష్ణు, మహేశ్వరులుగా విభజింపబడిన శుభమయిన మూడు మూర్తులు కలవాడా !
త్రిపురాసురులను కాఱుచిచ్చును ( అడవిలోనిదావాగ్నికి) చల్లార్చు మేఘములాంటివాడా!
ఎల్లప్పుడూ ఉండువాడా! దోషములేనివాడా ! వేదాంతములచే(ఉపనిషత్తులచే) విచారింపబడి తెలియదగినవాడా ! సంపద కలిగిన పరమశివా ! ప్రభూ! నీకు శుభోదయం.

విశేషాలు

త్రిపురాసురులు:
1. విద్యున్మాలి, 2. తారకాక్షుడు, 3. కమలాక్షుడు అను రాక్షసులు [వీరు తారకాసురుని కుమారులు]. వీరు గొప్ప తపస్సు చేసి శివుని అనుగ్రహమువలన ఇనుముతోను బంగారుతోను వెండితోను చేయబడిన మూడు కదిలేపట్టణములను పొంది లోకములను పాడుచేయుచు ఉండిరి. అప్పుడు విష్ణువు ఒక అవతారము ఎత్తి నారదుని తనకు శిష్యునిగా చేసికొని ఈ త్రిపురాసురులకును వీరి కాపులకును శివునియందలి భక్తి తొలగుటకు తగిన విషయములు బోధించాడు. అంత వీరును వీరి కాపులును శివద్వేషులు అయ్యారు. అందులకు శివుడు కోపించి వీరితో యుద్ధముచేసి వీరిని చంపెను. త్రిపురాసురులు తమ మరణానంతరము ప్రమథ గణములలో చేరారు.